摩天輪落嚟之後喺玫瑰花園影影相，順便迷迷路，玫瑰花園就好似個迷宮咁，小徑錯綜複雜，要「不踐踏草地」就要小心搵出口～
玫瑰花園裡面的搖搖鞦韆
本身曉詩唔係好想今日入去Miffy專區嘅阿姆斯特丹城住，因為未帶小噹噹（我哋嘅灰色兔子）出嚟，我哋三個又未著一早預備好嘅Miffy T恤，但係我哋話，今日去完聽日都可以再帶小噹噹嚟多次，佢哋就覺得OK啦～
Miffy專區最顯眼，當然係中間嘅兩個機動遊戲啦，係細細個小朋友都玩得嘅Miffy飛機同埋Miffy船，刺激度肯定低，因為好可愛，所以歡樂度高～Miffy專區有首主題音樂，呢兩日喺入面逗留得好長時間，所以識得自己哼出嚟，而家隔咗兩個星期，憑空諗唔到首歌出嚟lu～
我哋先去咗一個叫做Miffy Art Gallery嘅地方，唔使點排隊喎，但又有職員喺隊頭截住…
到我哋入去，一間細細嘅房間，掛咗幾幅好似小朋友畫、Miffy風格嘅畫喺牆上面，正喺度觀賞呢幾幅畫作時，突然有道門打開咗，有隻超大Miffy彈出嚟，原來所謂Art Gallery，其實係同Miffy見面、合照嘅地方，我哋完全冇心理準備就發生咗，而且因為佢好大，仲嚇一跳添，勁搞笑～
Miffy好親切同我哋打招呼同影相，最可惜小噹噹未一齊嚟～
之後我哋去排Miffy飛機，都要排30分鐘，主題樂園嚟講30分鐘唔算長，不過以香港嘅效率嚟講，嗰條隊應該唔需要30分鐘～照理上一組坐上去玩緊時，另一組可以排上最前+講解說明安全事項，可能豪斯登堡遊客唔算特多，未至於要考慮縮短排隊時間嘅程度啦～
排隊時依然好熱，好在我哋對正一個送風口，可以吹一陣～記得以前去有啲主題樂園，排隊超熱時，有啲灑水系統，幫大家降降溫，豪斯登堡嘅措施，就有得借陽傘俾大家遮陰，入去排隊時拎一把，到你玩時就有個桶可以俾你放返低，都不失為一個方法～
Miffy飛機被詩挑選為成個trip之中最精彩嘅一件事，好榮幸呀～佢畫咗落去暑期功課holiday journal入面添！玩法同香港迪士尼樂園嘅小飛象或者飛碟差不多啦，咁Miffy係好可愛嘅，尤其佢個X嘴～
排咗咁耐，終於輪到我哋啦~
玩完Miffy飛機已經差唔多七點，Miffy專區另外一個重點項目，就係想去每日慶典廚房食Miffy造型餐點～餐廳有位，梗係去食咗先啦～
我哋要試晒咁多款餐呀，叫咗三款普通餐+一款兒童餐，兩款特飲，除咗甜品之外，基本上試齊晒啦～
yeah~
我先食放係我面前嘅漢堡餐，雖然只係用個模嚟整嘅Miffy造型白飯，要篤開嚟食真係無從入手，唔捨得～
我哋一向所有食物全部share嘛，要將啲托盤捧嚟捧去太高風險，今次採取新策略，就係食物唔郁，人郁，呢啲簡餐店不停換位…umum…都唔太怪嘅，如果係正式少少嘅餐廳都係放食物係中間share比較恰當~
啲餸菜味道正常，全部都係日本小朋友嘅至愛餐點，例如咖喱飯，但係額外加上去嘅白雪雪軟綿綿Miffy味道就好怪，一團粉冇乜味，食唔出係乜嘢整成～^^;
仲有燉肉配蛋包飯，特飲有少少太甜，裡面有啲糖碎咬落sok sok聲幾好味~
兒童餐都好cute，原來水果撻個士多啤梨係朱古力，係後來先有人話我聽(我冇食粒士多啤梨嘛)，而家睇相又真係似朱古力喎~
每日慶典廚房
食飽飽，我哋要去搵定位睇夜間嘅噴水光影show，我哋唔夠早，前面已經有三排左右嘅人坐喺度，曉細細粒，搵到機會攝去前面坐，睇得清楚啲，叫埋個妹過去，點知一開始，有啲營造氣氛嘅音樂一出，詩就快速走返嚟黐住我坐～
大型噴水光影show佢哋應該係第一次睇，我記憶之中，噴水show最好睇嘅，非拉斯維加斯嘅Bellagio莫屬，可能嗰陣同老公（當時嘅未婚夫）兩個二人世界去睇吧，特別浪漫醉人～呢度比較特別嘅係，噴水池後面拉咗一個LED燈幕，日間喺下面經過時，只覺得係一串串燈飾，夜晚遠處睇過嚟就係一個screen，影像都幾sharp㗎～其實表演仲有另一樣特別之處，就係有大提琴小提琴現場演奏，我前面有人擋住，視力又冇三父女咁精靈，我當時真係唔知，事後曉知道咗我冇發覺有現場演奏佢好激動，覺得冇乜理由會唔知，咁我真係睇唔到丫嘛～
後面就係嗰個LED燈幕了~
睇完噴水光影show，仲有少少時間，我哋趁夜晚人少去玩埋Miffy船，原來我同爸爸都一張相都冇影喎～
不過有影可愛嘅Miffy廁所，摺耳嗰隻兔仔係Dan，係Miffy嘅好朋友，即是其他地方見到灰色嗰隻~而啡色嗰隻就叫Melanie~
跟住就走啦，反正第二日會full day再入園玩～不過今日嘅行程仲未結束，因為仲有我好期待嘅大浴場浸溫泉！豪斯登堡大倉酒店附有天然溫泉琴乃湯，仲有外湯添，我哋day 5入住嘅溫泉旅館都冇外湯添呀～
上次去熊本浸溫泉係一年半前，對於大人嚟講一年半係好短時間，但對詩嚟講，就係差不多六歲同埋八歲半嘅分別，佢都係覺得有啲陌生同戰戰兢兢，但佢都記得上次去菊池溫泉時熱到落唔到水，同埋返到熊本市就浸到落去，都唔係完全冇記憶嘅～琴乃湯都幾大，有十幾個沖涼位，內湯比較大，可以容納多啲人，溫度適中，大家都浸得舒服～外湯啲水熱啲，結果只有我浸到成個人落去～
家姐夠高著酒店睡衣(佢係唯一一個著晒咁多間酒店嘅睡衣嘅人)，詩就未夠大粒~
沖完涼，好滿足，一定瞓得更好啦～
P.S. 呢個狀態應該只維持咗少於10分鐘，之後詩都係決定黐住我瞓^^”即是曉自己一個瞓一邊，我爸詩瞓另一邊~
前往其他日本旅遊blog
